Сяргей Мікалаевіч Вышалескі (01.11.1874, г.п. Обаль Шумілінскага р-на Віцебскай вобл. - 14.01.1958), эпізаатолаг. Акадэмік Нацыянальнай акадэміі навук Беларусі (1928), прафесар (1924), ганаровы член УАСГНІЛ (1956). Заслужаны дзеяч навукі CCCР (1940).
Скончыў Варшаўскі ветэрынарны інстытут (1899). У 1928-1930 гг. загадчык кафедры Віцебскага ветэрынарнага інстытута, адначасова дырэктар Беларускага дзяржаўнага ветэрынарна-бактэрыялагічнага інстытута ў Віцебску. У 1931-1934 гг. працаваў у Казанскім і Маскоўскім навукова-даследчых ветэрынарных інстытутах. З 1934 г. прафесар Маскоўскага зааветэрынарнага інстытута. У 1929-1930 гг. член ЦВК БССР.
Распрацаваў метады барацьбы з сібірскай язвай, чумой і рожай свіней, сухотамі, бруцэлёзам, запаленьнем лёгкіх буйной рагатай жывёлы, колібацылёзам і паратыфам цялят, сапам коней. Выявіў узбуджальніка інфекцыйнага энцэфаламіеліту коней. Падрыхтаваў першыя ў СССР падручнік і кіраўніцтва па эпізааталогіі.
Дзяржаўная прэмія СССР 1941 г. за падручнік "Частковая эпізааталогія".
Апублікаваў каля 100 навуковых прац, у тым ліку 2 манаграфіі.
Узнагароджаны ордэнамі Леніна, Працоўнага Чырвонага Сцяга, "Знак Пашаны", медалямі. У 1974 г. УАСГНІЛ заснавала залаты медаль імя С.М.Вышалескага за выдатныя работы ў галіне агульнай і частковай эпізааталогіі. Імя С.М.Вышалескага прысвоена Інстытуту эксперыментальнай ветэрынарыі НАН Беларусі.
Асноўныя працы:
1. Частная эпизоотология. 3 изд. М.: Сельхозгиз, 1954.
2. Причины появления заразных болезней животных. 2 изд. М.: Сельхозгиз, 1959.
3. Избранные труды. М.: Колос, 1977.
Літаратура:
1. Калугин В. И. Академик С.Н. Вышелесский. М.: Сельхозгиз, 1954.
2. Библиографический указатель литературы академика С.Н. Вышелесского. Минск, 1974.
3. Сергей Николаевич Вышелесский (1874-1958). М.: ЦНСХБ, 1983.
4. Сергей Николаевич Вышелесский (К 135-летию со дня рождения) // Весці НАН Беларусі. Сер. агр. навук. 2009, №4.
